Tale Mulapeh Haji
BISMILLAH ITU MULAI BUTALE
ULUK MASJID UHANG PONDOK TINGGI
CAT NYU HIJAU BASURE PULO
ILUK NIA NASIB JAMAAH HAJI
SEMPAK BURANGKAT BETIGO TIGO
BAJU APO BAJU SAYO INI
BAJU JUBAH BATALI TALI
BAJU APO BAJU KAMI INI
BAJU JUBAH PAKAIAN HAJI
LAMAK TAPAI UHANG PENADAH
ORANG MUNGABAT DALAM JERAMI
KALU KAYO LATIBO MEKAH
JANGAN LUPO NGABIT KAMI
MAI KITO MUNGENTANG TALI
UNTUK PUNGEBAT SIRUMPUN PADI
MAI KITO TEGAK BUTALE
KITO MUNALE JAMAAH HAJI
WAHAI MINYAK DALAM PULITO
NANAM KAPEH DITEBING TINGGI
WAHAI DUNSANAK DENGA KAMI BUKATO
NAK KAMI LPEH IBO NIAN HATI
NAK KAMI TAHAN TAKUT DIDUSO
APU PUNABI SAWAH DILADANG
IMBEH IDAK BAJAK IDAK NYADO
APU PULAPI DUNSANAK BERANGKAT
MEH IDAK UANG DAK NYADO
TANAH KAMPUNG NEGERINYU SUBUR
IKAN BANYAK KELAPO MUNJADI
MAKSUD KAYO LAH DIMUKABU
MAKSUD KAMI MAKNYU SAMPAI PULO
KULURAH MUNCARI DAMA
DAMA DAPAT BARUNTUNG TIBUANG
KAMI KUMEKAH MENCARI AMAL
AMAL DAPAT DUSO TARABUANG
KARTON KORAN SARANG LAYANG LAYANG
ILUK DIBELAH MUNJADI DUO
SENANGKAN HATI KAYO BUJALAN
HATI KAMI JUGO YANG IBO
AYAM KURIK LALAPEH PULO
PADI MASAK DISAWAH TINGGAN
IDAK BAIK LINO LAMO
CUKUP RUKUN CEPAT KUMBALI
SANGGARANG AGUNG PASAR SELEMAN
SIMPANG KIRI SIMPANG TANJUNG TANAH
TEGUHKAN HATI KUATKAN IMAN
SERAHKAN DIRI KAPADO ALLAH
PADI APU PADI KAMI INI
PADI PAYO URANG KUMANTAN
UHANG MUNYAMO DITANAH LAPANG
MIMPI APO MIMPI KAMI INI
MBUK KAMI NAK SAMO IDAK NYADO NIA JALAN
TAMAN TUJUH DIDUSUN RIANG
NANAM KAPEH DITEPI SRIK
HATI RUSUH BUCAMPU RIANG
KAYO PGI BULAPEH BALIK KAMI TANTIK
SUNGI TUTUNG ADOLAH TAMAN
TEMPAT URANG BERULANG MANDI
DUNSANAK KANDUNG LAH KAMI TINGGAN
LPEH KAMI BURANGKAT KINI
SIPUCUK JAMBI SEMBILAN LURAH
TANAH KURINCI ALAM SAKTI
KREH HATI NAK KUMEKKAH
MAILAH KITO SEREMPAK PGI
KALU IDAK BUNGO DURIAN
DIMUKO INI BANYAK BUNGO MELATI
KALU IDAK ANAK KULIAH
ILUK NIAN KITO SEMPAK PGI
ILUK NIAN KUPADANG KINI
BELI BENSIN DISIMPANG BELUI
ILUK NIAN KU MEKKAH KINI
BERI IZIN JALAN KINI
ILUK NIAN KUPADANG KINI
NEBANG BULUH PANGKEN MUDO
ILUK NIAN KUMEKKAH KINI
TAU TUBUH BADAN AGI MUDO
BUGERAK MLI TARAM
MLI RADO KUTANAH RAWANG BUGERAK KAMI BUJALAN
BARU TERASO DUSANAK TINGGAN
KEMBANGLAH KAU BUNGO DURIAN
KEMBANG SERATO DENGAN BUNGO TALI
TINGGAN KAMPUNG HALAMAN
TINGGAN SERTO KAUM PUMILI
KEMBANGLAH KAU BUNGO DURIAN
KEMBANG SERTO BUNGO TALI
TINGGANLAH KAU UMAH DENGAN GEDANG
TINGGAN SERTO DENGAN ISI
ILUK NIAN KUPADANG KINI
TAU PANDAN SEDANG BUBUNGO
ILUK NIAN KUMEKKAH KINI
TAU TUBUH BADAN KUASO
WAHAI DUNSANAK DENGAN KAMI NGATO
BUKAK SILO DENGAN PADAT
UNGKAI LAH TUMPUN DENGAN RAPAT
BUDIRI TEGAK DENGAN SEMPORNO
DISURUK PINTU DITURUN TANGGO
TIBO DILAMAN KISAH NAGO
DIKADAH LANGIT DIKUTUNG BUMI
AMBIK LANGKAH DINGEN SIMPURNO
KAMI MUNAMPUH SILAMAN PANJANG
MENUJU MASJID GEDANG
UNTUK SEBAHYANG SUNAT DUO RAKAAT
SUBHANALLAH KAMI TURUT DOA
OTO BERANGKAT JEMAAH NAIK
KEMBANG KAU SIBUNGO GEDANG
KEMBANG SERTO DENGAN BUNGO TALI
SELAMAT TINGGAN MASJID GEDANG
SELAMAT TINGGAN KAUM FAMILI
NAMPI PADI KURANO BUAMPO
APO BANYAK BARAATAH IDAK
MAKSUD KAMI NAK SEMPAK DENGAN KAYO
NIAT ADO LANGKAH IDAK
MERAPAT KAPAL DITELUK BAYUR
NYUBERANGKAT PEGI KUJEDDAH
KAMI JEMAAH KUPADO ALLAH
MAK KAYO DAPAT HAJI MABRUR
BABILOK BILOK JALAN KUPADANG
NAMPAK RENAH MARO AIR KINCI
YAKIN YAKIN KAYO BUJALAN
MAK KAYO SAMPAI TANAH SUCI
LIMAU MANIH DITENGAH LAMAN
CUNDUNG KUJALAN NAK KAMI TUTUH
MANANGI URANG NGAN TINGGAN
MULAPEH KAKAK BURANGKAT JAUH
PASAR SIANG EMBUN MULABUH
BULAN BUTUKA DENGAN MATO HARI
DUSANAK SURANG BURANGKAT JAUH
KAMI LPEH NGAN HATI SUCI
BUAH PARE BUAH DELIMA
MASAK SETINGKIN UNTUH KEBATU
BANYAK DUNE UHANG DATEH DUNIA
KEMEKKAH JUGO NOMOR SATU
BAJU APO BAJU SAYO INI
BAJU JUBAH KUANTAN TARJI
BAJU APO BAJU KAMI INI
BAJU BINTANG MERAPI
URANG PENDUNG MLI PADI
MLI PADI SIPARO AMPO
DUSANAK KANDUNG KAMI TAHAN KINI
TAHUN DIMUKO BUSAMO KITO
TIGO PULUH JUZ ISI ALQURAN
SURAT ALFATIHAH DULU DIBACO
BIA EKO BUGUK BIA EKO TAHAN
KAMI BURANGKAT JUGO
DARI PADANG PEKAN BARU
KAMI BURANTI DIMUKO MUKO
KALU KAYO BURANGKAT DULU
KAMI BURANGKAT TAHUN DIMUKO
NAIK GUNUNG KEMANTAN TINGGI
TAMPAK RENAH UHANG KUTO DAYANG
MAKO KAMI BURANGKAT KINI
MEKKAH MADINAH TEBAYANG BAYANG
NAKI GUNUNG KEMANTAN TINGGI
NAMPAK RENAH UHANG KOTO MAJIDIN
KALU KAYO BURANGKAT KINI
ADIK NGETINGGAN SAPO KANTI BURUNDING
NAKI GUNUNG KUMANTAN TINGGI
NAMPAK RENAH UHANG DUSUN PENDUNG
MAKO KAYO BURANGKAT KINI
MEKKAH MADINAH IDAK TERLINDUNG
JANGAN CMEH KAMI IDAK BABNEH
BNEH ADO DALAM BAKUN BULUH
JANGAN CMEH KAMI IDAK BARAMEH
MEH ADO DALAM TANGAN SEPULUH
KALU ADO SAYO BABNEH
SAWAH TINGGAH DITANAM GALU
KALU ADO KAYO BARAMEH
SADU KAYO DENGAN TINGGAN NAK KAMI BAO GALU
DUSUN LAMO JALAN KAPANDUNG
JALAN TERUH KEMANTAN DARAT
LAH LAMO NIAT DIKANDUNG
BARU TAHUN INI KAMI DAPAT BURANGKAT
KALU LULO SIMPANG KUTO BENTO
DIMUDIK KUMUN DUSUN PONDOK TINGGI
BESAN GETO DENGAN KAMI NGATO
SENANGKAN HATI BERANGKAT KINI
KAMI LPEH DENGAN HATI SUCI
LAH LAMO KAMI DUDUK MUNGAJI
KEPEKAN JUGO KAMI MLI BENANG
LAH LAMO KAMI DUDUK BUPIKI
KAMAKKAH JUGO BARU HATI SENANG
URANG LADANG BALIK KUDUSUN
TIBO DIDUSUN JARANG BUGUNO
URANG KUMEKKAH NYAMPAIKAN RUKUN
RUKUN ISLAM MAKSAMPAI LIMO
sumber: buya aflizar
Tinggalkan komentar
Comments 0